Kraksal, 27th May 2025 salmario, Montri Brishaketu Debbarma tei TTAADC Haphangni chariphang adong okra Purna Chandra Jamatia no khobwi tei Tipra Motha ni MLA’s, EM tei MDC twiwi, Gomati Hangkhorni Hangkhorphang Tarit Kanti Chakma no kwrak raida ni bisingtwi majra rwnani sanwikha Haste Tangphang Okra J.K. Sinha ni thanio.
“Laithangnai Koktisal, 25th May 2025 salmarini sanja jorao juda juda tangbwtang twiwi Haa Bubagra Pradyot Bikram Manikya DebBarma tei TTAADC Haphangni chariphang adong okra Purna Chandra Jamatia bini tongthaio thangwi kokmalai khlaina thangmani, phiyaba malaina soiliya saknangya khlaiwi phirokrwi rohorkha Gomati Hangkhorni Hangkhorphang Tarit Kanti Chakma.
Talsa romwi Bubagra, Gomati Hangkhorni Hangkhorphang Tarit Kanti Chakma bai gwdalna bagwi chaitokgwi tongmani, phiyaba saknangjakliya Haa Bubagra no Tarit Kanti Chakma, Number Blocked khlaiwi rwmani koktwma.”
Abo hai patimung no nukgwi selengjakha hasteni thwngrwng tei hoda hamkrai ni samung tangnai rokno khobwi haste ni sinai nuknai lukurok.
Tamoni hwnkhe, Haa Bubagra tei Samung Chariphang okra rokno se borom rwmani kwrwi hwnkhe bahai khe tongkosong lukurokno borom rwui samung khlaiwi manai hwnwi swngmung kotor achaijak. Tei lukurokbo naio Nakarmung Sannani haiyakhe raida ni bisingtwi majra rwjakna ni wngthwng hwnwi.