Bisi Chi-Chuku (19years) umorni khoroksa hasteni rwswrwngnaijwk mung Sneha Debnath, Delhi University’s ni Atma Ram Sanatan Dharma College o B.Sc Mathematics no twiwi second year o rwswrwngnai, laithangnai Tangsal, 7th July 2025 salmario ni simi kwma mani, paithakgo Koktisal, 13th July 2025 salmario East Delhi ni Geeta Colony ganani Yamuna twio mankha bini mangkwthwi.
Sneha, boh Hasteni South Tripura Hangkhorni bisingo khobjaknai Sabroom amchaini Bhuratali kamini. Bini buphani mung Pritish Debnath (A Former Army personnel). Boh Bini nukhungni borok (Bupha,Buma tei Bini Bai) baino boh Delhi’s Paryavaran Complex o tongo.
Bini Bai Bipasa ni khuktwi saimankha, Sneha boh Tangsal, 7th July 2025 salmarini aichukgo bini mare Pitunia no Sarai Rohilla Railway Station o kabui, nairwkgwi phainai hwnwi sawui kwlangmani bini bumano. Phungni DamBa soti ChiBa (5:15 a.m.) tamani jorao boh malkhung(Cab) baikhe kawui nokni ongkhorwi thangmani malkhung mothornai(Cab Driver) Subhe Chandra mungbai.
Yagulo, phungni DamChar soti BrwiChiBa (8:45 a.m.) jorao Sneha ni phone switched off wngkheno wanalaina chengkha bini nukhungni bororok. Bini mare Pitunia no bo call khlaiwi swngkha biyango thangkha hwnwi. Yagulo malkhung(Cab) mothornai ni khuktwi saimankha, Sneha no Wazirabad ni Singnature Yakhwrai(Bridge) o ongkhorwi kabumani hwnwi.
Paithakgo nukhungni borok mankha bini yakbai swiwi kwlangjak mari (handwritten note), “Signature Bridge ni simi bakhlaiwi Langma mwthaknai” hwnwi. Ah thaio CCTV Footage bai kisa kwchal wngmani bagwi bini mangpli kahamkhe nukjakliya malkhung ni ongkhormani simi.
Bini kwma mani koktwma mankheno, Delhi Police ni phaisingtwi tei National Disaster Response Force (NDRF) ni saktharmungbai kotor naitukmung ni barja naharjakha. Ah salo Seven-kilometre hai naitukma yagulo bo manliya bohno.
Yagulo amchaini lukurok Twima ni yakhwrai o saichung bwrwi khoroksano nukma hai wngo hwnwi samabai. Langma Mwthangnai Bodol no twiwi kotor naitukmung ni barja pholokrwi rwjakmani Nigam Bodh Ghat ni simi Noida jora.
Koktisal, 13th July 2025 salmario kheno Geeta Colony ganani Yamuna twio mankha bini mangkwthwi. Nukhung ni phaisingtwi bo haino sinimung mankha bini mangkwthwi noh hwnwi.
Oh patimungni koktwma mankheno, B’Kha khama yapharkha Hasteni Montri Okra Dr. Manik Saha tei jeswk mansak chubachu rwna ni gosimung rwkha. Tei bohno karwi bo mayagwnang Haa Bubgara Pradyot Manikya Debbarma boh haino oh jorao, thwiwi thangjaknai nukhung ni lukurokno B’Kha khama yapharkha tei oh hamya jorao nukhungni bororok bai baksa logio tongnai hwnwi kok rwkha.
Paithakgo, sak sak langma sachowui thango hwnwi koktwmao saiui manphano, teibo naitukmung tei kuthuk khe saimani chaitongmungo tongnai hwnwi sakha Delhi Police.