June Talni, Dok Salmari wngkha Tipra Women Federation Songchama Sal. BisiTham swkang bwrwirokno bwskang twlangna bagwi phan boksina bagwi, Bubagra Pradyot Bikram Manikya Deb Barma wansukmani bisingtwi songchajakmani. Bisi brum brumni haikhe, oh songchama sal hohom dodomkhe hangkhor beremo palaijakgu, phiya taklai bisio koktwma thumnairokni bisingtwi, kwrwngsakhe malaiwi juda judakhe palayaui baksakhe Bubagra manjakmani bisingtwi palaina saklaijakmani.
Aboni bisingtwino taklai 2024 Sangrongsal June Talni, Dok Salmario Bugrakhor Agulini Town Hall o hohom dodomkhe, kwrwng kwrwng amchaini simi bwrwi bodolrok manjakmani bisingtwi TWFni songchama sal palaijakha. Aro manjakphaikha Bubagra Pradyot Bikram Manikya Deb Barma, Montri Animesh Debbarma, TWFni Kasku Manihar Debbarma khobwi Kubuni MLAs, TTAADC Haphangni EMs, MDCs tei TIPRA Motha TWFni juda juda adongrok.
Pandao manjaknai adongrokno Risa kanriwi lamsokmani ulo chati kwthar mwswnglaiwi Modern Architecture of Tripura hwnwi sinimung manjak, thwiwi thangjak Maharaja Bir Bikram Kishore Debbarma Manikya Bahadur ni mangphilio khum boklaiwi muito khlaikha.
Pandao koksana thangwi puilano Bubagra Pradyot, TWF samung tangwi tongmano khursakha tei Dophani chobao bwrwirokni phan bwswk joratwi nang saui khnarwkha. Ah salni pandao CAAno twywi hakotorni dorba nokgo mamla khlaijaknai tei choba bo khlainai hwnwi sakha, tei CAAno twiwi Bubagra mungsa kok thaisa bo saya hwnmano kok kwrak baikhe phirokmung rwkha tei CPIMno kulkha Kokthum Panda (Press Meet) khlaima bai simi CAAno kasui mangwlak hwnwi. Bubagra teibo sakha – Bwskang, Nokha Taldok(6)ni bisingo Tiprasa Siklarokno Sebok(Job), Lakai Rang(Loan), Quality Education rwna chaitoknai hwnwi.
