TangNwiRa(200+) ni slai bo kwbang baithang swijak tei buini swijakrok rwchapkha. Rwchapmung no karwibo Tiyari_Hukumu_Bodol bai thungnuk phunuk thanibo belai kwrwng. Swkal, Risi, Da Master tai laibuma rwkjak juda juda thungnuk phunuklangkha.
Bini rwchapmungo noh bini sinimungni langmano lukurokni khao kwthang khwlai achukrwi kwlangkha boh. Abohai Kokborok rochongrwthani samung kaham tangmabai, Jorani_Khorang_Sokat, Rangchak_Richak_Sokat tei juda juda haphangni sokatrokbo mankha. Rwchapmung mwsamung ni bisingtwi Bangladesh, Guwahati, Odisha tei juda juda hasteo thangwi rwchapbwi bolaimung manbukha.
Boh langma yakar phuru bini umor BrwiChiChuku (49years) bisi, kwlangkha Bihik tei Bwsa Chwla Khoroknwi. Boh phwrwngnai sebuk khlaimani. 2017 bisio salsa puila rwngnokni kiphilphuru Khumulwng dokholo Bike kasajakgono puila stroke wngo. Aphuruni simino bini sak twrwk twrwk kebelo. Phiyaba boh chaitokkha sakno mwthangna bagwi khorang kwmajak, yakung kompa wngjak phano pandarogo koroyawui thangwi manjagwi b’kha swrangnani chaitokmani, phiyaba paithak jora hamna bagwi daledal bithi chawibo hamliya kidney kainwino kwpwla baiwi 14th April 2021 salo o hano yakarwi thango.
Bini swimung, mwsamung, rwchapmung bebakno kwlangwi thangjakha yak bukcha khaiwi. Bono kwmawi Kokborok rwchapmungni tai kiphilwi manliya obohai manwino kwmajakkha.
Hasteni Rwchapkrwngkuk Athukiri Boromgwnang Bimal Debbarma ni paithak samung khlaijakha Khowai Rajnagar Tulasikok Kamio. Ah salo bini Jaiti gustirokno karwibo kwbangkukno bono hamjaknai bini rwchapmung khnathokjaknairok tei mungwnang swikrwng rwchapkrwng wansukrwng rok thangwi paithak nairwkmung nairwgwibaikha. Paithak nairwkgwinai joto khagwnang lukurok muktwi sokokyawi tongwi Malailiya hasteni o kahama Athukiri kolsano kwmajaklaiwi.
