NorthEast ni juda juda thaio Rangchak Haste Tripura ni sinimung tei Tiprasa dophani mung kuchukgo kariui tongo Tripura Hasteni no Charilam, Bishramganj Amchaini Bukhuk Debika Debbarma. Bini bupha wngkha Dilip kr. Debbarma, Haste naimwthang bedek ni sebuk, tei buma Kriti Rani Debbarma wngkha nukhungni hamjwk.
Agartala ni Bardowali High Secondary School ni class 12 paimani yagulo bo, Holy Cross College o English Honours nawui B.A completed khlaikha. Tabuk bo IGNOU o English Honours nawui no Master khlaiwi tongo.
Chwraini simino boh kotor kotor imang nukgo tei boh bini imangno mukthangbo khlaina muchungjakgo. Bini o imang nukmani baino tabuk boh sinimung manwi tongo.
Rwngswrwngmani logi-logi bini bayab chalai tei mare-kiching songbai kaham wansukmung tei khakamung rokno twiwi salaio tei bo chwraini simino rwchapmung mwsamung bo hamjakgo.
Sal kisa swkang juda juda NorthEast thaini bororok bai baksano boh bo, songchajak Miss NorthEast 2023 o bataimung pandao haste wngwi thangwi bataimungo gwdalwikha. Kwplai wngwi manbuya phano Miss NorthEast 2023 Miss Photogenic kwplai wngwi hasteo, mwkhango mwnwimung tubui kiphilkha. Tei jotto lukurokno b’kha bai Hambai yapharwi hamari yachakha Bukhuk Debika Debbarma.
